Ekambareswarar tenplua

Ekambareswarar tenplua
Pancha Bhoota Stalam
Irudi gehiago
Kokapena



Herrialdea	India

Indiako estatua	Tamil Nadu

Indiako barruti	Kanchipuram barrutia

Hiria	Kanchipuram

Koordenatuak	12°50′51″N 79°42′00″E / 12.8475°N 79.7°E / 12.8475; 79.7

Kudeatzailea	Hindu Religious and Charitable Endowments Department
Kontaktua
E-posta	mailto:[email protected] eta mailto:[email protected]
Telefonoa	tel:+91-44-2722-2084 eta tel:+91-44-2723-2083
Webgune ofiziala

Ekambareswarar edo Ekambaranathar tenplua Shiva jainkoari eskainitako tenplu hindua da. Kanchipuram hirian dago, Tamil Nadun (India). Saivismoaren sekta indiarrarentzat adierazgarria da "bost elementuekin" lotutako tenpluetako bat delako, Pancha Bhoota Stalas esaten dutenetako bat, bereziki lurreko elementua den Prithvi delakoarekin lotua.

Ezaugarriak

Non eta Kanchipuramen Vishnu jainkoa gurtzen den batik bat tenpluetan, Shivaren lingamak irudikatzen dira hemen nagusiki, ehundaka alerekin, "mila zutabeen aretoa" esaten zaion tokian. Hala ere, tenpluaren barruan bada egitura bat Nilathingal Thundam Perumal delakoa, hau ere tenplua eta Vishnuren gurtzari emana, Divya desam bat, Vishnuismoaren kanonean gurtzen diren 108 tenpluetarik bat^[1].

Tenpluaren konplexuak 10 hektarea pasahartzen ditu, eta Indiako handienetako bat da. Gopuram izeneko lau harrera-dorre ditu. Altuena hegoaldeko dorrea da, 11 solairu ditu eta 58 metroko altuera, Indiako tenplu-dorre altuenetako bat da.

Tenpluaren konplexuan areto asko daude; nabarmenena Vijayanagar garaian eraikitako aretoa da, non "Mila zutabeen" korridorea dagoen. Gaur egunera iritsi diren harrizko egitura gehienak Cholako dinastian eraiki ziren IX. mendean, eta ondorengo hedapenak Vijayanagarako agintariei egozten zaizkie^[2].

Mango sakratuaren kondaira

Kondairak dioenez, behin Parvatik, Shivaren emazteak, penitentzia egin nahi izan zuen tenpluko mango zuhaitz zaharraren azpian, Vegavathi ibaiaren ondoan^[3]. Bere debozioa frogatzeko, penitentzia latzak sufriarazi zizkion han Shivak: sua jaurti zuen bere gainera, eta Parvati jainkosak Vishnu anaiaren laguntzaz itzali zuen hura. Shivak jarraian Ganges ibaiaren uholde bat zuzendu zuen bertara, eta ibaiari berari otoi eginez, senideak zirela frogatuz, gelditu zuen hori Parvatik. Are gehiago, Parvatik hareazko shiva linga bat eraiki zuen, Shivarekin elkartzeko, eta horregatik Shiva Jainkoari hemen Ekambareswarar esaten zaio, Mango Zuhaitzaren Jauna.

Aurrerago, lingam horretara hurbildu zen beste jainkosa bat, Kamakshi izenekoa, eta besarkatu zuelarik idoloa, Shiva bera azaldu zen zerutik eta besarkada hori ezkontza bilakatu zen, mango sakratuaren azpian^[4].

Mango zuhaitz bat gurtzen da tenpluan, gertaera horien lekukoa zahar originala balitz bezala, 3.500 urteko zuhaitza bailitzan.

Iruditegia

Sarrera eta gopuram nagusia.
Lingam multzoa.
Bisitariak "mila zutabeen" artean.
Sheshanaga, buru ugariko sugea, prozesio baterako pieza tenpluan gordea.
Gurtutako zezen irudi bat, Shivaren sinboloa.
Mango sakratua, Shiva eta Kamakshi ezkondu ziren tokia.
Kamakshi eta Shivaren ezkontza, bertako panel moderno batean.

Erreferentziak

↑ Sajnani, Manohar. (2001). Encyclopaedia of tourism resources in India. Kalpaz Pub, 305 or. ISBN 81-7835-014-9. PMC 62541529. (Noiz kontsultatua: 2022-09-28).
↑ (Ingelesez) PBe. (2021-08-13). «[PDF India Through The Ages By Madan Gopal » Panot Book»] Panot Book (Noiz kontsultatua: 2022-09-28).
↑ Jagadisa Ayyar, P. V.. (2000). South Indian shrines. ([Reprint]. argitaraldia) Rupa & Co, 71-72 or. ISBN 81-7167-410-0. PMC 636968998. (Noiz kontsultatua: 2022-09-28).
↑ (Ingelesez) «The place where Lord Shiva and Devi Kamakshi's marriage took place! - Review of Ekambareswarar Temple, Kanchipuram, India» Tripadvisor (Noiz kontsultatua: 2022-09-28).